zara sa qatra kaheen aaj agar ubhartaa hai
samandaron hi ke lehje mein baat karta hai
khuli chhaton ke diye kabke bujh gaye hote
koi to hai jo havaaon ke par qatarta hai
sharaafaton ki yahaan koi ehmiyat hi nahiin
kisi ka kuchh na bigaado to kaun darta hai
zameen ki kaisi waqaalat ho phir nahiin chalti
jab aasmaan se koi faisla utarta hai
tum aa gaye ho to phir kuchh chaandni si baatein hon
zameen pe chaand kahaan roz-roz utartaa hai
No comments:
Post a Comment